قصيدة امي يا اجمل نغم للشاعرة نعيمة رحيمي

أمي ياأجمل نغم
ياأجمل نغم بتغنيه شفايفي
يا نجمة منورة سمايا
صدرك علي حنين
وحضنك هو غطايا
أحس الكون ملك إيدي
لو سمعت صوتك ندهلي
أشم ريحة ورد الجناين
لما تقوليلي ربنا يحميك ياضنايا
ياما ذاكرتي دروسي
وأشوف في عنيك خوف على خوفي
بتذاكري معايا الواجب
وكل يوم بتديني مصروفي
بإيديك لباب المدرسة توديني
وتقولي يارب تحميلي ضنايا
سنة وراء وراء عدت وكبرت في حضنك
وبقيت راجل مال وهدومي
وإنت بتخاف علي
وبتسهري على راحتي ونومي
ولا يوم نمت قبل ماروح
وتدعي يارب تهديلي ضنايا
كل يوم أروح بالليل
أتطوح زي السكرانين
ألاقيك قدام البيت
والدمع بيجري على الخدين
أزعق وأقول مالك دنا بقيت راجل
بتردي وتقولي يارب منتكونش عليه من الغاضبين
ده مهما كان بردوا ضنايا
ياما تحملت قساوتي
ولا يوم سمعت منك كلمة قسية
شايلاني جوة عينيك
ودايما بتجبيلي أغلى هدية
بتحرمي نفسك من كل حاجة
ولا مرة قلت ياناس أنا محتاجة
كل مناك ضحكة على وشي
وتقولي يارب إحميلي ضنايا
يامنورة حياتي من وأنا صغير
بتتغير كل الناس وأنت عمرك عني ماتتغير
كل الناس عندها قمر في السماء
وأنت قمرحياتي لما تهلي تنور
أبوس إيديك ورجليك
تضميني في أحضانك زي الطفل الصغير
وتنادي يارب إحميلي ضنايا
نعيمة رحيمي